CAGAYAN DE ORO CITY – Gitawag sa kanhi House prosecution panel member nga si former City Mayor Atty Oscar Moreno nga demolition job gikan sa pipila ka personalidad ang nadawatan nga batikos sa 240 ka magbabalaod nga misuporta sa impeachment complaint kontra Vice Pres Sara Duterte.
Kini human nabulit sa pasangil ang mga kongresista nga adunay madawat nga minilyong salapi agi’g baylo sa ilang pagpirma sa mga reklamo kontra Duterte.
Miingon si Moreno nga dili makiangayon ang maong pasangil ngadto sa mga kongresista nga gusto mapanubag si Inday Sara sa dul-an napulo ka article of impeachment nga nakapending sa senado.
Siya miingon nga dako kini nga kahigayunan nga maluwas ni VP Sara ang iyang kaugalingon pinaagi sa paghatag sa tukmang tubag batok sa mga pasangil.
Si Moreno sa nagsilbi pang kongresista sa unang distrito sa Misamis Oriental ang kabahin sa mipalagpot sa katungdanan kang kanhi Pres Joseph ‘Erap’ Estrada tungod sa isyu sa jueteng payola sa tuig 2000-2001.
