Walay natun-an ang mga Pilipino sa kasaysayan tungod sa padayon nga pagbalik-balik sa mga sayop ug korapsyon sa nasud.
Mao kini ang gihimong pagsaway ni heritage consultant Ryan Albert Ignatius Sanchez sa sitwasyon karon sa Pilipinas subay sa bag-ohay lang nga pagdomdom sa Adlaw sa mga Bayani.
Sa interbyu sa Bombo Radyo, gipadayag ni Sanchez nga hangtod karon pakyas ang katawhan sa pagkat-on tungod sa pagdumili nga makat-on gikan sa mga pakigbisog sa nangaging mga bayani.
Subay niini, gitin-aw sa heritage expert nga ang gibatukan kaniadto nila Jose Rizal ug Andres Bonifacio nga abusado ug korap nga sistema maoy nagpadayon gihapon ug mas misamot pa kalisod sa kasamtangan.
Tungod sa maong sitwasyon, gipahimangnoan niini ang tanan nga puy-an ug ipadayon ang pakigbisog alang sa usa ka hapsay ug maayong katilingban.
