CAGAYAN DE ORO CITY-Dili na ipagamit o papuy-an sa Maranao-Muslims ang bahin nga naguba tungod sa pag-atake sa teroristang Maute-ISIS group sa Marawi City.
Kini maoy kabahin sa sugyot sa ilado nga urban planner Architech Felinon Palafox Jr nga personal nakasaksi sa kadaot sa Marawi City.
Miingon si Palafox nga angay mabalhin ang Marawi City ug i-preserbar ang mismong main battle area isip handuman sa pakigbisog sa militar batok sa mga terorista.
Una nang gibutyag ni Palafox nga abton pa sa 50 ka tuig ayha subli makabangon sa hingpit gikan sa dakong
kadaot ang Marawi City.
Samtang imposibli ang pipila ka sugyot ni Palafox kabahin sa pag-rehab sa naguba nga Marawi City.
Kini human unang gisugyot ni Palafox nga angay dili na tandugon ang dakong bahin sa Marawi City ug i-preserbar nga magamit sa kasaysayan.
Miingon si Atty Ombra Gandamra,regional director sa National Commission on Muslim Filipinos o NCMF-10 nga dili mosugot niini ang mga Maranao ilabina kon sundon ang 50 ka tuig nga hingpit pagkabangon sa Marawi City.
Namugos si Gandamra kinsa uyuan ni City Mayor Majul Gandamra nga kugihan ang mga Maranao aron sila subli makabangon gikan sa ilang pagkapukan.
