Palasyo, gipatin-aw ang rason sa pagbalhin sa mga opisyal sa gabinete sa administrasyong Marcos

Gipatin-aw ni Palace Press Officer ug Presidential Communications Office Undersecretary Claire Castro nga ang pagbalhin sa mga opisyal sa gabinete ngadto sa laing katungdanan kay wala magpasabot nga napakyas sila sa pagdumala sa ilang kanhing mga ahensya.

Gipagawas niya ang pamahayag human gipahayag sa mga grupo sa negosyo ang ilang kabalaka bahin sa posibleng epekto sa pagbag-o sa liderato sa pipila ka ahensya sa gobyerno, lakip na ang Bureau of Customs (BOC), Bureau of Internal Revenue (BIR), Bases Conversion and Development Authority (BCDA) ug Philippine Economic Zone Authority (PEZA).

Lakip sa mga pagbag-o mao ang pagbalhin ni kanhing BOC Commissioner Ariel Nepomuceno isip pangulo ug chief executive officer sa BCDA, samtang si kanhing BIR Commissioner Charlito Martin Mendoza ang mihulip kaniya sa BOC ug si Rolando Ligon Jr. ang nahimong bag-ong pangulo sa BIR.

Matud ni Castro, ang desisyon ni Presidente Ferdinand Marcos Jr. kay gibase sa iyang tinguha nga ibutang ang mga kwalipikado ug dunay katakus nga opisyal sa mga posisyon diin mas magamit ang ilang kasinatian ug abilidad. (raniel mahunyag)