Gihulagway sa ekonomista ug kanhi Bise Gobernador sa Misamis Oriental nga si Joey Pelaez nga puros “guni-guni” ug pangilad lang ang pangangkon sa Palasyo nga kayang bayran sa kasamtangang administrasyon ang 19 ka trilyong piso nga utang sa nasod.
Gipasabot sa kanhi opisyal nga nag-atubang sa grabeng kalisod ang ekonomiya sa Pilipinas tungod sa mubo nga gross domestic product ug sa nagkataas nga presyo sa mga palitunon.
Gipadayag usab ni Pelaez nga dili na gani magdagan ang operasyon sa gobyerno kon walay bag-ong utang tungod kay dako nga bahin sa pondo ang napadulong lang sa pagbayad sa interes ug kapital sa utang.
Tungod niini, nagpadayag ang ekonomista og dakong kabalaka sa kahimtang sa nasod kon padayon nga patuohon ang katawhan sa mga saad nga layo sa tinuod nga sitwasyon sa pondo.
