CAGAYAN DE ORO CITY- Nasuko ug gitumboy sa grupong United States Allied Freedom Fighters of the East o USAFFE ang kapolisan ug militar nga igo lamang migamit kanila dinhi sa syudad.
Kini human gi-pursige sa kapolisan ang pagkaso’g kriminal sa piskalya batok sa pito ka sakop ni USAFFE founder Atty Ely Pamatong dihang nasitar sila sa checkpoint sa Brgy Tablon sa syudad sa miaging adlaw.
Namugos si Pamatong nga dili mga dautang tawo ang iyang mga miembro sukwahi sa mga binuhatan sa mga terorista ug mga rebelde.
Moduso usab sila sa kontra-demanda tungod sa pagkaso sa iyang mga miembro sa piskalya sa syudad.
Samtang wala na makurat ang kapolisan sa himoong lakang ni USAFFE founder Atty Ely Pamatong batok kanila.Kini human kasuhi sa pagsupak sa article 170 sa revised penal code o illegal paggamit sa military uniforms ug insignia.
Gibutyag ni C/Insp Mardy Hortillosa,tigpamaba sa Cagayan de Oro City Police Office o COCPO nga gihimo lamang nila ang ilang trabaho batok sa grupo ni Pamatong.
Namugos si Hortillosa nga tataw nga usurpation of authority ang gihimo sa mga suspek nga sila si Rey Butal, Felipe Manila,Erlidan Piedad,Edgar Gumahad,Mario Hingcayog ug Florencio Mier hinungdan sila gipangkasuhan sa piskalya.
