CAGAYAN DE ORO CITY-Idangop sa kontrobersyal nga lider sa grupong United States Allied Freedom Fighters of the East o USAFFE nga si Atty Ely Pamatong kang Pres Rodrigo Duterte ang paglusob sa Martial Law- Special Action Group diha sa Tabucnai,Brgy Tablon sa syudad kagahapong sa buntag.
Kini human akusahi ni Pamatong ang mga otoridad nga nang-planting sa mga granada ug armas aron siya masikop ug ipapatay sulod sa bilangguan.
Gibutyag ni Pamatong nga tawagan niini si Duterte aron pangayu-on nga ipalagpot ang mga pulis nga mi-atake sa iyang kampo kay namiligro ang kinabuhi niya.
Samtang ipasaka sa Criminal Investigation and Detection Group o CIDG-10 ang kasong pagbaton sa ilegal nga armas ug mga eksplosibo batok sa grupo ni Pamatong sa piskalya ning syudad sunod semana.
Kini bisan nga giakusahan ni Pamatong ang naglangkob sa MLaw-SAG nga mihimo’g pag-planting sa mga ebedensiya sa iyang kampo aron siya masikop.
Namahayag si ML-SAG member CIDG deputy director for operations head Supt Melgar Devaras nga mismo siya ang nakakita sa mga sakop ni Pamatong nga nagbaton sa mga armas atol sa mga surveillance nga ilang gihimo kaniadto.
Kini ang hinungdan nga nagpagawas ang korte sa 42 ka search warrants aron sudlon ang kampo ni Pamatong diin nakuha ang duha ka granada,kalibre 45,military uniforms ug mga bandila sa Pilipinas ug Amerika.
