CAGAYAN DE ORO CITY – Gikalipay sa pamilyang Andutan ang pagtahan sa gitudlong utok pag-ambush patay kang Dr Raul Winston Andutan Jr nga si Balingoan vice mayoralty candidate ug incumbent municipal councilor Richard Gepte.
Gipalanog sa kapikas nga si Dra Maria Milagros Andutan ang iyang pagpasalamat sa PNP ug ubang mga tawo nga nakatabang sa paghupay sa ilang gibati pinaagi sa eksklusibong interbyu sa Bombo Radyo.
Gibutyag ni Dra Andutan nga wala pa sila’y masulti nga lain apan gihulat nila ang dugang resulta sa imbestigasyon sa mga pulis aron masuta kon nganong gipa-ambush ang iyang bana.
Una nang nag-atubang sa kasong murder si Gepte ingon man ang at large nga si Reynaldo Tortusa ug ang tulo ka akusado nga gisuhulan nila aron banhigan-patay si Andutan samtang padulong sa Maria Reyna-Xavier University Hospital sa miaging Disyembre 2,2021.
Samtang gipa-konsensiya sa pamilya Andutan ang mga akusado nga unta ila nang itug-an atubangan sa korte ang pinaka-rason kon nganong gipapatay si Andutan Jr.
Miingon ang balo nga si Dra Andutan nga tinguha nila ang hustisya sanglit matarong nga bana ang biktima ug dako’g gugma pagtabang sa mga pasyente niini sa ospital kaniadto.
Gani,pabiling blangko pa sila nga sa kadagha’g pagdayeg ug pasidungog nga nakuha sa biktima gikan sa medical society,kalit nga kamatayon ang isukli niini.
Una usab niini,gipamugos sa kampo ni Gepte nga wala siya’y kalabutan sa pagpatay kang Andutan Jr.Kini subay sa giluwatang pahayag sa abogado ni Gepte nga si Atty Silva Sabio kinsa maoy nagkumbensir sa iyang kliyente nga mo-surender ngadto kang Police Regional Office 10 Director Brig Gen Benjamin Acorda Jr sa miaging adlaw’ng Domingo.
Gibutyag ni Sabio nga kini ang rason nga isog sila nga mitahan sa PNP kay andam nila pamatud-an atubangan sa korte nga dili tinood nga si Gepte ang utok sa pagpapatay kang Andutan.
Hisayrang gikasuhan sa murder si Gepte tungod sa mga testimonya sa tulo ka suspected gun for hire nga nadakpan sa PNP sa residential address niini sa Brgy San Alonzo,Balingoan sa milabay’ng Disyembre 3.
