CAGAYAN DE ORO CITY – Gikalipay sa pamilyang Dormitorio ang pagpaubos sa court martial sa pito ka kadete nga suspek sa pagpatay kang Cadet 4th class Darwin Dormitorio.
Gibutyag ni Dexter Dormitorio nga dako kini’g ikatabang aron dili makaikyas ang mga suspek.
Siya miingon nga gawas sa hustisya, padayon ang ilang panawagan nga mawala ang hazing ug mabag-o ang kultura sulod sa akademya.
Una nang ipaagi sa court martial ang 7 ka PMA cadets alang sa administrative case batok kanila.
Samtang lig-on nga ebidensya ang gibasehan sa pamilyang Dormitorio sa pagkaso batok sa mga nalambigit sa pagpatay kang Darwin.
Sumala ni Dormitorio nga wala na nila pasaka-e sa kaso sila si resigned PMA Superintendent Lieutenant General Ronnie Evangelista ug former Commandant of Cadets Brig Gen Bartolome Vicente Bacarro tungod sa kakulangon sa ebidensya.
Dili gusto ang ilang pamilya nga masayang ang iduso nga kaso hinungdan nga naniguro sila nga bug-at nga reklamo ang ilang mapasaka.
Una nang gikompirmar sa PMA nga wala pay lakip sa court martial ang mga opisyal nga nalambigit sa kamatayon sa Cagay-anong kadete.
