Naglaum ang pamilya sa usa ka biktima sa ‘drug war’ nga mahatagan og silot si kanhi Presidente Rodrigo Duterte sa International Criminal Court (ICC).Sa panayam sa Bombo Radyo, si Nanette Castillo miingon nga dugay na nilang gihulat nga adunay kausaban sa kaso ni Duterte.
Mapasalamaton matod pa ang mga pamilya sa mga biktima sa extrajudicial killings nga adunay na’y lihok sa kaso nga giatubang sa kanhi presidente.
Segun pa niya, kinahanglan nga abrihon na sa katawhan ang kasingkasing ug hunahuna sa kamatuoran nga ang war on drugs dili lang mahitabo sa mga ordinaryong tawo apan pwedeng mahitabo sa tanan.
Para ni Castillo, ang trial ug posible nga pagkakondena kang Duterte mahimong dakong leksyon sa tanang dagkong opisyal nga walay mas taas pa sa balaod, ug nga ang hustisya mugula sa insaktong panahon.
Kompyansa si Castillo nga sila makadaog sa maong kaso ug makabaton sa hustisya nga dugay na nilang gipangita.
