CAGAYAN DE ORO CITY-Naglaraw ang pamilyang Tambiga nga ipadayon ang pagpasaka’g kaso batok kang Jerry Bagdan.
Kini bisan gipamugos sa suspek nga aksidente ang nahitabo ug wala niya tuyo-a nga mabanggaan patay ang biktima.
Sumala ni Joseph Tambiga Sr ang amahan sa biktima nga ilang kasuhan ang drayber kun ugaling dili sila magkasinabot sa tag-iya sa trak ilabina sa ilang pangayoon nga mga demanda.
Gibutyag usab sa klasmeyt sa namatay’ng si Joseph Tambiga nga nakainom ang biktima sa dihang nabanggaan kini sa 18-wheeler trak diha sa Brgy Bugo ning syudad.
Sumala ni Roselyn Antibo nga adunay kalingawan sa ilang tunghaan hinungdan nga nakainom ang biktima kagabii.
Una nang miggawas ang report nga miambak sa gisakyang de-pasayruang jeep ang biktima hinungdan nga naligsan kini sa trak.
Samtang nangayo’g pasaylo ang 18-wheeler trak drayber nga si Jerry Bagdan sa pamilyang Tambiga.
Kini human aksidente niyang nabanggan ang graduating student sa criminology.
Matud ni Bagdan nga wala siya masayod nga iyang nabanggaan ang biktima tungod kay igo lamang niya kini nakita nga nagbuy-od na sa dalan.
Una niini, detinado na sa bilangguan ang suspek ug nag-atubang sa kasong reckless imprudence resulting to homicide.
