CAGAYAN DE ORO CITY – Gipanganti sa inahan ni John Mark Rayon nga iyang kasuhan ang mga pulis nga misikop sa iyang anak gumikan sa illegal nga droga diha sa may Zone 4, Sta Cruz Tagoloan,Misamis Oriental.
Kini human akusahi si Rayon nga suspek pagpatay kang RTA enforcer Mark Langam IV samtang mihimo’g road clearing operation sa Brgy Puerto sa syudad sa miaging semana.
Miingon ang inahan sa suspek nga si Elizabeth Rayon nga kasuhan usab niya ang mga pulis nga nagtumo-tumo kanila’g sala aron ipaangkon sa kamatayon ni Langam.
Una niini,gibulgar usab sa kaipon ni John Mark nga si Ana Rose Nala nga gipugos kini pagpaangkon aron iduot ang iyang pares nga mipatay kang Langam aron giingong makuha ang 500-mil pesos nga reward money nga gitanyag ni City Mayor Oscar Moreno.
Samtang giangkon ni City Director Col Henry Dampal nga naghatag kanila’g dakong presyur ang pagsulbad sa kamatayon ni Langam IV nga taga-Brgy Cugman sa syudad.
Namugos si Dampal nga wala nagkahulugan nga ‘fall guy’ o sayop nga tawo ang nadakpan sa Tagoloan Police Station aron ipaangkon sa kamatayon ni Langam.
Miingon ang opisyal nga may kuha nga sa CCTV camera diin naklaro si John Mark Rayon dihang giingong gihubo niini ang gisul-ob niya nga helmet ayha sibat gikan sa crime scene.
Giklaro usab niini wala sila’y gipugos o gibaharan nga tawo aron tudluon si Rayon nga utok sa kamatayon sa biktima.
