CAGAYAN DE ORO CITY – Kasuhan sa pamilya ug kabanay ni Cadet 4th Class Darwin Dormitorio ang pipila ka opisyal sa Philippine Military Academy o PMA Baguio City.
Kini tungod sa pakyas mapugngan ang hazing diin gikamatay ni Dormitorio samtang nagpaubos sa subsob nga training sa PMA sa miaging semana.
Gibutyag sa iyaan ni Darwin nga si Michelle Usman nga gihulat na lamang nila ang resulta sa imbestigasyon sa PNP ug NBI aron mohimo usab sa kaugalingong lakang paghatag hustisya sa hitabo.
Una niini,gikompirmar sa PNP-Baguio City nga namatay tungod sa grabeng kulata o hazing si Dormitorio sukwahi sa gipatoo sa doktor nga mihiling nga nagka-urinary tract infection o UTI ang iyang gidangatan.
Kasamtangang gihaya si Dormitorio sa Cosmopolitan Funeral Homes ug gitakdang ilubong ugmang adlawa.
