CAGAYAN DE ORO CITY – Nalipay pag-ayo ang pamilyang Fernandez nga nakab-ot na nila ang hustisya sa pagka-dagit sa ilang anak nga hinimuan sa lima ka aktibong pulis kaniadto sa Masterson Avenue,Upper Balulang ning syudad.
Kini human hukmi nga sad-an sa kidnapping case sila former police officers Sr Inps Irenio Ramirez;PO2 Alejandro Ubanan;PO2 Sangkulan Hussien;SPO2 Alaindelon Tacubao ug SPO2 Jojo Lim nga pulos sakop kaniadto sa nabungkag nga special unit sa Cagayan de Oro City Police Office o COCPO.
Miingon ang amahan nga si Enrique Eric’ Fernandez Jr nga dako nila nga kalipay nga sa katapusan nahukman na sa RTC Branch 17 ang mga akusado aron makuha na nila ang hustisya sa pagkadagit ug pagka-missing sa ilang anak na si Enrique ‘Eking’ Fernandez III.
Giangkon ni Fernandez Jr nga dili sayon ang ilang naagian samtang nakig-away sulod sa korte batok sa maong mga pulis.
Gawas nga bilangguon sa tibuok kinabuhi ang mga konbiktado,gipabayad usab sila sa korte sa daghang damyos nga nahiaguman sa pamilyang Fernandez.
Samtang kumbinsido ang pamilya nga gisunog sa mga akusadong pulis si ‘Eking’ hinungdang wala na makauli nga buhi.
Kini ang nadawatan nga impormasyon ni ‘Eric’ Jr gikan sa iyang mga higalang pulis rason nga napugos na lang sila pagdawat sa sakit nga kamatayon sa ilang anak.
Miingon si Fernandez Jr nga kon nakit-an pa nila ang patay’ng lawas ni Eking kasuhan usab unta nila sa murder ang grupo ni Ramirez.
Gani,midangop na sila sa tinuhuang-binisaya aron lang matultulan ang lugar diin gipatay ug gitago ang patay’ng lawas ni Fernandez III.
