CAGAYAN DE ORO CITY – Gisugat sa dili maayong hitabo ang bag-ong tuig sa pamilyang Nacalaban kabahin sa kahimtang sa Pinay worker nga taga-Cagayan de Oro City nga nanimpalad sa pagtrabaho sa Kuwait sugod pa tuig 2019.
Kini human kompirmaha sa Department of Migrant Workers ug Overseas Workers Welfare Administration o OWWA nga patay na ang domestic worker nga si Dafnie Nacalaban nga taga-Sitio Cana-an,Brgy Dansolihon diin nangagalon sa pamilyang Kuwaiti sa Middle East niadtong Disyembre 2024.
Subay sa pasiunang imbestigasyon,dugta nang nakit-an ang patay’ng lawas sa biktima nga nahaw-as sa gilubngan niini luyo sa harden sa balay sa iyang amo.
Nasuta nga maoy gitudlong akusado sa kamatayon sa biktima ang Kuwaiti natl nga si Jarrah Jassem Abdulghani kinsa gi-akusahan usab nga mipatay sa hinigugma niini nga Pinay pipila ka bulan na ang milabay.
Nabulgar ang kamatayon sa biktima kay mismo ang igsoon sa suspek ang mi-taho niini sa kapolisan niadtong Disyembre 28,2024.
Sa pagkutlo ning balita, namulong ang mga kabanay sa biktima nga gusto nila makuha ang patay’ng lawas niini aron mahatagan sa pormal nga pag-atiman ayha ang paglubong ning syudad.
Gipangayo sa pamilya sa 35 anyos nga biktima ang hustisya aron madugta sa prisohan ang akusado nga mipatay kaniya sa wala matug-an nga hinungdan.
Ulahi nga nakontak si Dafnie sa iyang pamilya niadto pang Oktobre 2024 apan nakurat na lang sila sa balita nga patay na kini hinungdang nangayo sila sa hustisya sa hitabo.
Hisayrang gitoohan nga gihilabtan una ang pagka-babaye sa biktima,gisunog ayha gilubong sa akusado kinsa dinakpan na nag-atubang sa kasong kriminal.
