Pangdaot ug pamolitika lamang ang pagpagawas og arrest warrant batok kay Vice President Sara Duterte aron guboton ug hugawan ang iyang mga plano sa 2028 presidential election.
Kini ang gibutyag ni Ateneo de Davao Professor Christopher Maboloc samtang iyang gihulagway nga usa ka desperadong pagpangguyod sa korte ang maong lakang sa mga kaatbang sa bise presidente samtang giatubang pa niini ang proseso sa impeachment trial sa Senado.
Dugang pa sa propesor, gituyo ang maong aksyon aron mapadausdos ang taas nga trust rating sa bise presidente ug guboton ang pampublikong dungog sa opisyal pinaagi sa padayong pagpamasangil.
Giklaro usab sa akademiko nga walay lig-ong basihan ang gihimo sa mga kritiko tungod kay lapas kini sa saktong legal process.
