Usa na ka dakong krisis sa nasod ang kinahanglang pagtratar sa tulo ka sunod-sunod nga pamusil sa mga pampublikong eskwelahan sulod lang sa tulo ka bulan.
Mao kini ang gipahayag sa Liberal Youth Northern Mindanao pinaagi sa ilang Chairman nga si Andre Josol, diin gitin-aw niya nga peligroso kaayo ang kahimtang sa mga eskwelahan tungod kay subay sa COA audit report, 39% lang sa mga tunghaan ang adunay CCTV ug 39% ra usab ang may gwardya.
Gumikan niini, gipangayo ni Josol sa nasyonal nga gobyerno nga palig-onon dayon ang seguridad sa mga eskwelahan ug maghimo og mas tinuod nga aksyon gawas sa mga shooting drill sa DepEd.
Gidugang sa lider nga kinahanglang mahimong luwas ang mga eskwelahan tungod kay dinhi nagtukod sa ilang kaugmaon ang mga estudyante, ug ang kabulangan sa seguridad makaguba sa pag-uswag sa nasod.-
