Dili lamang personal nga panagbangi ang nahitabo kundili lakip usab sa parliamentary procedure ug mga proseso sa Senado ang lalis tali ni Senador Rodante Marcoleta ug Blue Ribbon Committee Chairman Ping Lacson, matod ni Atty. Proculo Sarmen, usa ka labor law expert ug abogado.
Gitataw ni Sarmen nga gikan sa legal nga panan-aw, ang maong isyu naglangkob sa interpretasyon sa rules of the Senate ug sa mga katungod sa matag senador ubos sa Konstitusyon.
Iyang gilaraw nga ang presentasyon ni Lacson usa lamang ka privilege speech ug dili pa opisyal nga committee report tungod kay wala kini mapirmahan sa gikinahanglan nga siyam ka miyembro sa Senado.
Labaw pa niini, iyang giingon nga adunay katungod ang usa ka senador nga dili motubag dayon sa interpellation kon kini gihatud isip privilege speech ubos sa parliamentary rules.
Gawas pa niini, iyang gibutyag nga tungod sa panagbangi sa duha ka senador, nalimtan ang tinuod nga tuyo sa deliberasyon ug oversight function sa Senado sa pag-imbestigar sa mga problema ug kakulian sa gobyerno.
Matod pa niya, posible nga dili na mapadayon sa hustong dagan ang interpellation ug mawad-an og pokus ang maong pagdungog.
