CAGAYAN DE ORO CITY – Gihimakak ni kanhi City Councilor Eric Salcedo nga siya ang nagsulsol sa konseho nga hukasan sa pagsilbing lider sa mayoriya si Kag. Ian Mark Nacaya.
Tubag kini ni Salcedo sa panaghap ni kanhi City Mayor Oscar Moreno nga mani-obra nila ni Kag. Roger Abaday,SK Federation President Kag. John Michael Seno ug bisan ni ABC Federation President Kag. Alam Lim ang lakang aron sipaon si Nacaya ug ipuli si Kag. Edgar Cabanlas.
Miingon si Salcedo nga dili matago nga dunay kasuko si Moreno kaniya kay siya lang ang nagbinugtong nga sakop sa mayoriya kaniadto nga ga-kuwestiyon sa pipila ka gisudlang transaksyon sa syudad.
Una niini,dili motoo si Moreno nga walay kasayuran si City Mayor Rolando ‘Klarex’ Uy sa nahitabong pagkapha ni Nacaya sa liderato sa konseho.
Sa pikas bahin,wala sa kapas ni Seno nga kumbinsihon ang mayoriya sa konseho aron ipuli si Cabanlas sa ilang pagsipa kang Nacaya.
Kini ang tubag ni Seno batok sa pasangil ni Moreno nga sinabutan nila ni Salcedo ug Abaday ang pagbag-o sa liderato sa konseho.
Siya miingon nga igo ra kini gisugo sa mayoriya aron ihikyad ang resolusyon nga nagtumong pagbag-o sa liderato sa konseho.
Samtang nagdumili na usab kini pagtubag sa nabulgar nga miduol siya kang Moreno kaniadto aron pailisan si Nacaya.
Dugtong niini,gisaway ni Cabanlas ang pipila ka personalidad nga namugos nga mando ni Uy nga sipaon sa katungdanan si Nacaya aron siya ang ipuli.
Miingon si Cabanlas nga wala sa iyang pagkatawo nga mangilog sa gahom kay nagdugang-dugang lamang kini sa iyang trabaho.
Wala direkta lakbiti sa konsehal kon kinsa ang iyang gibatikos apan bugtong si Moreno lamang ang dayag misulti nga imposible nga wala masayod si Klarex nga ipalagpot si Nacaya kay ipuli si Cabanlas nga mangulo sa mayoriya.
Si Cabanlas ug Moreno ang solido nga alyado usab sulod sa siyam ka tuig nga kanhi administrasyon.
