Gitin-aw ni Fr. Der John Faborada, Social Communication Apostolate sa Archdiocese of Cagayan de Oro, nga ang pagtulun-an sa simbahan wala nag-awhag sa pagtuo sa mga psychic ug sa ilang mga prediksyon sa mga panghitabo sa kinabuhi sama sa mga katalagman.
Hinuon, gipasabot sa maong opisyal nga angay hatagan og prayoridad ang pagpakita og pagsalig sa Ginoo ug ang paghimo sa kaugalingon isip instrumento sa Iyang gugma ngadto sa uban ilabi na sa panahon sa kalisdanan.
Dugang pa ni Fr. Faborada, dili matagna sa tawo ang mga natural nga kalamidad sama sa linog ug bagyo tungod kay kini kabahin sa dinamikong dagan sa kalibutan nga dili makontrolar.
Busa, gipahinumdoman niya ang mga tumutuo nga imbis magsalig sa mga panagna, mas maayo nga mahimong andam ug motabang sa isig-kaingon aron mabati nila ang presensya sa Ginoo.
