Usa ka dakong leksyon sa katawhan ang pagpili sa husto nga mga lider nga nakasabot sa kalisod ug yango-ngo sa labor sector, mao kini ang komento ni Artikulo Onse Convenor Leody De Guzman sa tataw nga pag-antos sa mga mamumuo.
Gipasabot niya nga padayong nag-antos ang mga kabos tungod kay ang gobyerno gikan sa una hangtod karon kontrolado gihapon sa mga kapitalista ug nanalipod ra sa interes sa dagkong mga negosyo sama sa kuryente, komunikasyon, ug transportasyon.
Busa ang panawagan sa maong labor leader sa mga katawhan mao ang paghimo niini nga leksyon ug dili na ibotar sa eleksyon ang mga adunahan, negosyante, ug mga dinastiya.
Hinuon, gidasig niini ang mga botante nga hatagan og higayon ang mga lider gikan sa mismong sektor nga kanunay nilang kauban sa pakigbisog, may eleksyon man o wala.
