Gipadayag ni Registered Psychometrician Stella Setier-Ferarrez nga dili lang sa pinansyal nga aspeto masukod ang papel sa usa ka amahan sa pamilya.
Bisan pa man kon ang inahan ang nagtrabaho ug ang amahan ang nag-atiman sa panimalay, giisip gihapon kini nga usa ka dakong responsibilidad ug trabaho.
Dugang pa niya, ang pagpabilin sa amahan sa balay aron paghatag og siguridad ug pag-atiman sa mga anak usa ka bililhong kontribusyon nga angayan gayod hatagan og apresasyon.
Hinuon, gipasabot sa eksperto nga dili angayan nga ma-frustrate ang mga amahan kon dili sila ang naghatag og kwarta tungod kay daghan pa og laing matang sa panginahanglan ang pamilya nga ilang matubag.
Segun pa ni Ferarrez, angay huna-hunaon sa tanang amahan nga ang ilang presensya ug pag-atiman sa sulod sa balay maoy timailhan sa ilang pagka-responsableng ginikanan.
