Gihatagan og dakong prayoridad sa opisina ni Misamis Oriental Governor Juliette Uy ang pagpanalipod sa panglawas sa mga Misamisnon taliwala sa padayong bahad sa El Niño ug grabeng kainit sa lalawigan.
Gipahayag ni Health Education and Promotion Officer II Rainier Frederick Miego sa Provincial Health Office nga nagpagawas na og opisyal nga advisory ang lalawigan, diin gitutuokan ang kahimtang sa mga senior citizen ug kadtong adunay balatian sama sa diabetes ug altapresyon tungod kay mas dali silang maapektuhan sa abnormal nga temperatura.
Subay niini, gipasidaan usab sa opisyal ang posibleng pagdaghan sa mga kaso sa sakit gikan sa lamok gumikan sa pagpundo og tubig sa mga panimalay samtang nagpadayon ang kainit.
Mao nga gidasig sa mga awtoridad ang mga lumulupyo nga magpalayo sa kainit sa adlaw sugod alas nuybe sa buntag hangtod alas kwatro sa hapon o magdala og kalo ug payong kon kinahanglang mogawas sa balay.
