CAGAYAN DE ORO CITY – Gikasuhan sa kapolisan sa double murder ang parking boy suspek nga nadakpan sa follow up operation sa pantalan sa Brgy Macabalan kay gusto motago didto sa Cebu.
Giila ni Carmen Police Station commander Maj Mario Mantala Jr ang magsoong biktima nga si John ug Barry Abecia samtang ang suspek mao si Bert Abapo Jr,pulos legal ang mga edad ug managsilingan sa Zone 9,Creekside,Macanhan,Brgy Carmen ning syudad.
Miingon si Mantala nga dumot ang hinungdan kon nganong nagka-dinunggabay ang mga biktima ug suspek.
Nagbaton sa daghang igo sa dinunggaban ang mga biktima nga hinungdan sa ilang kamatayon.Si Abapo ang kanhi dunay homicide case samtang ubos usab sa illegal drug monitoring ang magsoong Abecia sa diha sa Carmen ning syudad.
Samtang self-defense!
Kini ang gipamugos sa stabbing suspect nga si Abapo kon nganong nadunggaban-patay niini ang iyang mga silingang magsoon ning syudad.
Gibutyag ni Abapo nga una kining gidagmalan sa mga biktima hinungdang miuli ug mikuha kini’g kardaga sa ilang balay ug nakig-dinunggabay sa magsoon.
Gihulat na sa kapolisan ang commitment order gikan sa korte aron isaka sa city jail ang suspek.
