CAGAYAN DE ORO CITY – Dili magduha-duha ka paghandos sa kasong criminal ang Police Regional Office 10 batok sa pipila ka politiko nga nga giakusahan nga nalambigit sa ‘vote buying’ ngadto sa mga botante ning syudad.
Kini human mikatap sa social media ang pipila ka kuha nga video clip diin nakitaa ang paglinya sa daghang mga tawo nga gitoohan nga midawat sa salapi bugti sa pagbotar nila sa pipila ka mga kandidato sa May 12 elections.
Maoy gitumbok ni PRO 10 spokesperson Major Joann Navarro ang eksena sa usa ka porsyon sa Brgy Carmen ning syudad diin nagsumikad ang maong gidudahan nga pinalitay sa mga boto.
Siya miingon nga gihimuan na kini sa subsob nga imbestigasyon sa lower units haom sa mando ni PRO 10 Director Brig Gen Jaysen De Guzman dihang nakaabot sa ilang atensyon.
Gibutyag ni Navarro nga agdon nila ang resulta sa imbestigasyon kung unsa usab ang makuha nga mga ebedensiya kabahin sa maong isyu.
Giklaro sa opisyal nga wala pa sila motoo sa pasangil sanglit dayag nga daghan nga mga mani-obra ang mugna sa matag-kampo sa mga kandidato atubangan sa publiko aron lang dautaon ang kaatbang o paboran ang bando niini sa politika.
