CAGAYAN DE ORO CITY – Natanggong ang daghang mga pasahero sa pantalan ning syudad epekto sa mga kanselasyon sa mga biyahe sa mga barko gikan Northern Mindanao padulong sa Visayas ug kauluhan.
Kini epekto sa lakang sa PCG Cagayan de Oro District kay gisunod ang abiso sa PAG-ASA gumikan sa bagyong Kristine.
Miingon si Lt Junior Grade Kristine Indog,acting station commander,PCG-Cagayan de Oro District nga kabahin sa kanseladong mga biyahe sa mga barko ang padulong sa Iloilo,Cebu,Manila ug Batangas.
Gawas niini,anaa usab sa tulo ka passenger vessels ang stranded sa Macabalan Port samtang laing upat ka cargo ships ang kasamtangang wala mobiyahe gumikan sa peligro nga dala sa bagyong Kristine.
Hisayran nga bisan walay pagbaha sa rehiyon apan kanselado mga klase gikan sa primarya hangtod sa kolehiyo sa Camiguin province,tag-upat ka lungsod sa Misamis Oriental ingon man sa Bukidnon ug usa ka munisipyo sa Misamis Occidental.
