(Update) CAGAYAN DE ORO CITY – Kasamtangang nakahaya ang patay’ng lawas sa kontrobersyal nga kanhi komisyoner sa Commission on Elections o Comelec nga si Atty Virgilio ‘Garci’ Garcillano sa Saint Peter’s Chapel sa Brgy Lumbia ning syudad.
Kini subay sa pasiunang impormasyon nga gilugwa ni Commission on Elections 10 regional director Atty. Renato Magbutay kabahin sa kamatayon ni Garcillano.
Sumala sa pagsugilon sa pamilya niini, kalit kining natumba sulod sa pansayan sa ilang pinuy-anan ug nawad-an sa panimoot diin kapaspas sa hitabo wala na matabang sa mga mananambal.
Sumala ni Magbutay nga ihaya pa sa pila ka adlaw ang patay’ng lawas sa kanhi nila opisyal ayha kini itumod sa katapusang pahulayan sa Pryce Gardens nga kanhi Oro Gardens nga anaa sa Brgy Lumbia ning dakbayan.
Si Garcillano ang nabutang sa kontrobersya kay giakusahan kini nga nalambigit sa giingong mani-obra sa pagpanikas sa eleksyon ni kanhi presidente ug karon Pampanga Congreswoman Gloria Macapagal Arroyo diin gipidli si late action star Fernando Poe Jr (FPJ) sa 2004 presidential elections.
Apan sulti sa mga nakaila kiniya ilabina sa mga silingan niini sa Brgy Imbatug,Baungon,Bukidnon nga sobra ka maayong tawo kin sukwahi sa dili maayu nga paghulagway kaniya atubangan sa publiko.
Sa buhi pa usab si Garci, miagi kini sa pagptambal sa duha ka dagkong ospital sa kauluhan tungod sa gihambing prostate disease.
Namatay si Garcillano sa edad 86 sa mismong puluy-anan niini sa Baungon,Bukidnon niadtong Marso 29 sa gabii.
Hisayrang si Garci ang midagan sa pagka-kongresista sa Bukidnon sa 2007 elections apan wala buligi sa kahigayunan.
