Nahidangat na ang patay’ng lawas ni Pope Francis sulod sa Saint Peter’s Basilica alang sa public viewing sa mga tawo nga gusto mohatag sa katapusang pag-respeto ngadto kaniya.
Kini haom sa nalatid nga iskedyul sa Vaticano kabahin sa pag-atiman sa patay’ng lawas sa santo papa gikan sa iyang pinuy-anan sa Casa Santa Marta pasulod sa Basilica.
Gilauman nga mangabot ang global head of states aron mohatag sa katapusang respeto ug pagpasalamat sa daghang nahimo ni Pope Francis sa ilang tagsa-tagsa ka kanasuran ilabina kadtong nag-atubang sa dagkong mga isyu.
Si Pope Francis nga nagsilbing ika-266 ka santo papa sa simbahang Katolika ang dose ka tuig nga nangulo sa sobra bilyong mga miembro sa tibuk kalibutan sukad napili Marso 13, 2013.
Siya namatay sa edad 88 tungod sa pagka-stroke sulod sa iyang pinuy-anan niadtong Abril 21 sa buntag.
Tungod niini, mapugos ang liderato sa simbahang Katolika nga mohimo sa pagpatawag sa tanang cardinals gikan sa nagkadaiyang kanasuran aron magkatigom ug mopahigayon sa conclave.
Kini nga kalihukan higayon nga dagha’g hisgutan ang mga cardinal hangtod nga moabot sa punto nga sila mohimo na sa pagpili sa bag-ong santo papa pinaagi sa 2/3 of votes aron panguluhan ang simbahang Katolika.
Hisayrang sa maong katiguman sa college of cardinals,tulo kanila ang mga Pinoy nga naglakip kang Luis Antonio Tagle nga nakabase na sa Vatican, CBCP President Pablo Virgilio David ug Manila Jose Cardinal Advincula.
