CAGAYAN DE ORO CITY – Kuhaon sa Philippine Air Force ang patay’ng lawas sa ilang duha ka piloto nga sila Major Jude Salang-oy nga lumad taga-Cordillera Administrative Region ug 1Lt April John ‘AJ’ Dadulla nga tubong-Brgy Alae,Manolo Fortich,Bukidnon padulong sa headquarters niini sa Colonel Jesus Villamor Air Base sa kauluhan.
Miingon si Air Force spokesperson Col. Maria Consuelo Castillo nga tuyo niini nga mahatagan sa funeral honor ug pagtunol sa laing pasidungog ang bayanihon nga kaakuhan sa duruha nga kabahin sa mihulog sa mga bomba sa lokasyon sa 70 ka CPP-NPA rebels sa Brgy Iba,Cabanglasan,Bukidnon sa miaging Martes sa kadlawon.
Gibutyag ni Castillo nga gihulat na lang nila nga mahuman ang forensic examination sa patay’ng lawas ilang mga piloto ayha ibiyahe padulong sa kauluhan ning adlawa o sa pagka-Sabado.
Hisayrang nahagsa ang gimaneho ni Dadulla ug Salang-oy nga FA-50 fighter jet igo pagkahuman sa ilang misyon diin sila narekober didto na sa Mt Kalatungan,Brgy Mirayon,Talakag,Bukdinon sa miaging Miyerkules sa buntag.
