CAGAYAN DE ORO CITY-Gimugna na sa 4ID Phil Army ang usa ka board inquiry aron imbestigaran ang pagransak sa kanhi rebel returnee sa patrol base sa Kibungkog, San Fernando, Bukidnon.
Miingon si 1st Lt Tere Ingente, tigpamaba sa 4ID nga nga giila ang lider sa miransak sa kampo nga si Lawless Armed Group (LAG) leader Aldie Salusad alyas “Butchoy”.
Kuyog ni Butchoy ang duha ka akomplis nga CAFGU ug walo ka tawo.
Giila ni Ingente ang duha ka konsabo nga CAFGU nga sila Ruben Subuan ug Malone Dandalan.
Base sa pamahayag ni Sgt Junio, ang assistant patrol base commander, nakasulod sa kampo si Butchuy human nagpa-aron-ingkon nga mutawag sa iyang amahan nga si Ben Salusad, kinsa kasamtangang napriso sa Cagayan de Oro City Jail.
Sa pagsulod sa kampo, gilayong gigapos sa duha ka konsabo nga CAFGU si Sgt Junio.
Nalimas sa mga rebelde ang 14 ka mga high powered firearms nga gilakipan sa 2 ka R4 riffles; 8-M16 rifles; 1-carbine; 4-garand rifle; 1-Harris Radio, cellphones, uniporme sa sundalo ug combat packbags.
Milusad na sa hot pursuit operation ang 88IB batok sa nakasibat nga mga suspek.
