Sukwahi sa kabalaka sa kadagahanan bahin sa pagpatuman sa Pax Silica, gipahayag ni CoRRECT Movement Lead Convenor Orion Perez Dumdum nga mas maayong pahimuslan sa Pilipinas ang maong oportunidad gikan sa US aron dili na kinahanglan pang molarga sa gawas sa nasod ang mga Pilipino para lang makatrabaho.
Gitinaw ni Dumdum nga dili mohimo og mga data center ang nasod tungod kay init ang klima sa Pilipinas, apan mas mag-focus kini sa pagproseso sa kaugalingong mga mineral sama sa nickel ug sa paghimo og mga semiconductor chips.
Dugang pa sa maong opisyal, imbes nga ipagawas ang mga hilaw nga mineral, mas maayo nga diri na kini iproseso aron direktang magamit sa mga lokal nga pabrika ug semiconductor companies.
Tungod niini, ang mga kompanya na gikan sa gawas ang moanha sa Pilipinas, hinungdan nga makatrabaho na sa kaugalingong nasod ang mga lokal nga IT professional ug uban pang mga mamumuo imbes nga mag-OFW.
