Dakong ilad sa mga mag-uuma ug Aeta sa Tarlac ang giduso nga Pax Silica project sa gobyerno.
Mao kini ang seryosong pahayag ug pagkontra sa Kalipunan ng Damayang Mahihirap kun Kadamay pinaagi sa ilang Secretary General nga si Mimi Doringo, diin gitin-aw niya nga gipugos lang ang maong proyekto alang sa interes sa Amerika taliwala sa pagpangilog ug pagguba sa ilang yuta.
Gipahayag ni Doringo nga gipang-aresto pa gani ang lima ka paralegal sa gihimong Investor’s Forum sa Bonifacio Global City niadtong Septiyembre 10, ug gipang-harass ang halos 17 ka sakyanan nga misalmot sa solidarity caravan sa Manila.
Gidugang sa opisyal nga bakak ang saad nga maghatag kini og maayong trabaho, tungod kay magpabilin ra gihapon nga gamay ug ubos ang suholan ubos sa Regional Wage Board.
Tungod niini, nagpasidaan ang Kadamay nga mas maayo pa nga ang gobyerno mismo ang magtukod ug magkontrol sa kaugalingong industriya aron mapanalipdan ang panginabuhian, ang importanteng kinahanglanon sa tawo, ug ang yuta sa nasod.
