Nanawagan si Presidente Ferdinand Marcos Jr. alang sa mas lig-on nga kooperasyon tali sa mga nasud, United Nations (UN), ASEAN, ug pribadong sektor aron mapadali ang pagkab-ot sa Sustainable Development Goals (SDGs) sa tuig sa 2030.
Matud ni Marcos, wala nay upat ka tuig ang nahibilin sa gitakdang panahon sa pagkab-ot sa maong mga tumong, apan 36 porsiyento pa lamang sa mga target nga masukod ang pag-uswag ang anaa sa hustong dalan.
Gipasiugda ni Marcos nga aron makab-ot ang mga tumong sa gitakdang panahon kay gikinahanglan ang bag-ong politikanhong kabubut-on, mas lig-on nga panag-uban sa pribadong sektor, ug kooperasyong nakabase sa ebidensya.
Dugang pa sa Presidente, gipalig-on sa ASEAN ug UN ang ilang kooperasyon pinaagi sa 2026–2030 Plan of Action ug sa pagpahiuyon sa ASEAN Community Vision 2045 ngadto sa 2030 Agenda, samtang giabi-abi usab niya ang resolusyon sa UN nga nagtimaan sa ika-50 nga anibersaryo sa Treaty of Amity and Cooperation in Southeast Asia.
Dugtong niini, lakip sa mga prayoridad nga sakop sa ilang panag-uban kay ang kalinaw ug seguridad, pamatigayon, digital transformation, blue economy, panglawas, seguridad sa pagkaon, pagdumala sa katalagman, ug aksiyon batok sa pagbag-o sa klima. (raniel mahunyag)




