Gipasidan-an ni Pres Bongbong Marcos ang uban pang mga personalidad nga dunay dagkong atraso sa balaod nga dili na madugay ug sila makuha gihapon sa kagamhanan.
Gihimo sa presidente ang mensahe nunot sa pagka-dakpi ni kanhi Bamban Mayor Alice Guo sa Indonesian police force samtang nagtago sa usa ka hotel sa Tangerang City,Indonesia kaganihang kadlawon.
Siya miingon nga mahimong makadagan ug makatago sa mubo nga panahon ang mga dakponon apan dili sa tanang higayon nga sila gawasnon apan mataral gihapon sila sa kagamhanan.
Miingon si Marcos nga ingon ani ang nahitabo kang Guo nga nagtinguha nga likayan ang mga obligasyong-legal niini sa Pilipinas.
Dugtong usab niini,gipasalamatan ni Marcos ang Indonesian govt tungod sa paspas nga pag-aksyon sa hangyo sa Pilipinas nga makuha si Guo nga dunay daghang atraso.
Nanganti nang daan ang presidente nga manubag ang mga tawo nga mitabang kang Guo aron maka-eskapo padulong sa Indonesia gikan sa Pilipinas sukad pa Hulyo ning tuiga.
