Gipasalig ni Rear Admiral Roy Vincent Trinidad, tigpamaba sa AFP alang sa West Philippine Sea, nga ang matag patrol ug operasyon sa Pilipinas sa nagsamin sa ilang responsibilidad ubos sa maritime domain, ug kini dokumentado aron adunay lig-on nga basehan sa pagmonitor ug pagtubag sa mga insidente sa dagat.
Sa pakighinabi kaniya sa Bombo Radyo, mibutyag si Trinidad nga padayon nga gipakusog sa AFP ang maritime patrols niini sa West Philippine Sea aron mapanalipdan ang soberanya ug sovereign rights sa nasud atubangan sa nagkadaghang presensya sa mga barko sa China.
Miingon ang opisyal nga ang datos ug obserbasyon nga makuha sa mga pagpatrolya, usa ka importante nga basihan sa pagdesisyon kung asa ipadala ang mga barko ug eroplano sa Pilipinas.
Hisayran nga sa matag operasyon sa AFP, malampuson man o dili, kanunay kining gahatagan sa after-action review aron masusi ang nahitabo ug mapalambo pa ang seguridad ug mga pamaagi sa umaabot nga mga misyon.
Sa pagkakaron, magpadayon ang AFP sa pagpatuman sa rotation and resupply missions, maritime patrols ug air surveillance flights subay sa mandato niini ug sa internasyonal nga balaod bisan pa sa mga hagit ug panghilabot nga ilang masugatan sa West Philippine Sea.
