CAGAYAN DE ORO CITY – Maglugwa sa simplified materials ang Presidential Communications Operations Office o PCOO kabahin sa hisgutanang pederalismo nga gihingusgan ni Pangulong Rodrigo Duterte atubangan sa katawhang Pilipinhon.
Kini human dili init ang pagdawat sa publiko sa tuyo sa gobierno nga maghulip sa sistema gikan sa unitary form padulong sa pederalismo nga maghatag gahom nga idumala nga kinaugalingon ang matag-rehiyon sa nasud.
Kini ang pag-angkon ni PCOO Asssistant Secretary Atty Kristian Ablan kabahin sa nadawat nga feedback gikan sa katawhan tungod sa kabug-at sa hisgutanan ug angay mapasayon ang unod sa federal draft aron masabtan sa tanan.
Miingon si Ablan nga kini ang hinungdan nga wala una sila maglugwa sa report gikan sa mga sektor nga nahatagan nila sa pagpasabot kay dili nila gusto madugangan ang kalibog sa katawhan.
Gibutyag ni Ablan nga paghuman sa piliay sa Mayo 13 ning tuiga,sugdan na nila ang pag-imprinta sa mga material sama sa leaflets o brochures nga simple nga nagpasabot sa pederalismo.
Dumduman nga una nang mipalag ang pipila ka sektor tungod sa dili maayo nga pagtuki sa pederalismo diin bisan ang cabinet officials ang naglisod pagsabot niini.
Nasayran nga bisan ang Kamara ang nagbaton usab sa kaugalingong bersyon sa balaodnon sa pederalismo nga miani’g lain-laing reaksyon tungod sa pagsilbing self-serving sa mga magbababalaod.
