Usa ka dakong inhustisya alang sa mga konsumante ang pagpas-an sa bayronon sa usik nga kuryente o ang system loss charge, sumala pa kang People’s Constitutional Reform Initiative Convenor Wilson Amad .
Gihulagway sa opisyal nga wala gayud nakasinati og kalugi ang mga power company, tungod kay ang mga nawalang kuryente pinaagi sa kawat, gubaon nga metro, ug kalit nga brownout maoy diretso ra nga gitugyan ug gipabayad sa walay-sala nga publiko.
Dugang pa niini, gipunting ni Amad nga gihasol na gani ang katawhan sa kanunay nga hulga sa pagputol sa serbisyo kon ma-late og gamay sa pagbayad, samtang ang dagkong kumpanya igo ra nga nagtan-aw sa ilang puro nga ginansya imbes nga maghimo og seryosong aksyon, sama sa pagpataas sa mga poste ibabaw sa gitas-on sa mga kahoy aron malikayan ang aksidente.
Tungod niining grabeng sitwasyon, hugot nga nanawagan ang opisyal nga kinahanglan nang bag-ohon ang maong sistema, tungod kay dili na gyud makatarunganon nga ang mga ordinaryong lungsanon ang kanunay nga magsagubang sa tanang kahuyang sa mga kumpanya sa kuryente.
