CAGAYAN DE ORO CITY – Giwagtang na ni Pres Rodrigo Duterte ang closure order sa pipila ka mga padula sa Philippine Charity Sweepstakes Office o PCSO kagabii.
Kini bisan nga magpadayon ang imbestigasyon sa National Bureau of Investigation o NBI kabahin sa isyu sa kurapsyon sa maong ahensiya.
Apan giklaro ni Presidential spokesperson Salvador Panelo nga ubos gihapon sa suspension ang mga padula sa Small Town Lottery o STL,Peryahan ng Bayan ug Keno.
Kini tungod kay sa maong mga padula nadiskobre ni Duterte nga nagsumikad ang pasangil sa kurapsyon ug ilegal nga kalihukan.
Samtang motabang paghangyo si acting City Mayor Girlie Balaba ngadto kang Duterte nga mapabalik na sa labing daling panahon ang operasyon sa legal Small Town Lottery o STL nga naglihok dinhi sa syudad ug lalawigan.
Kini human unang nagpabati sa kahingawa ang STL ug lotto operators sa ilang dakong lugi gumikan sa PCSO closure order ni Duterte.
Miingon si Balaba nga himoon niya ang tanan aron mahangyo si Duterte kinsa ‘su-od’ niini nga higala alang sa maong katuyuan.
Una nang gibutyag sa Misamis Oriental -Cagayan de Oro Lotto Agents Association nga anaa sa libo sila nga apektado sa mando ni Duterte.
