CAGAYAN DE ORO CITY – Ipatawag sa committee on games and amusement sa city council ang Philippine Charity Sweepstakes Office o PCSO,PNP ug ubang ahensiya sa gobierno ning syudad.
Kini human ibulgar ni Pres Rodrigo Duterte nga dili masumpo ang paghitak sa ilegal nga pasugal nga karibal sa PCSO games tungod sa proteksyon sa pipila ka military ug police officials sa syudad.
Namahayag si Kag Roger Abaday kinsa chairman sa komitiba nga tuyo sa imbestigasyon nga matumbok kon kinsa ang protectors sa ilegal nga mga pasugal nga naapektar sa mga padula sa PCSO.
Dumduman nga bugtong wala ipabalik ni Duterte nga ipadula sa PCSO ang Small Town Lottery o STL, Peryahan ng Bayan ug Keno kay gihimua’g hinangal diin tinubdan na hinoon sa kurapsyon.
Samtang giangkon sa Police Regional Office o PRO-10 nga dili limpyo ang ilang ahensiya pag-abot sa pasangil ilabina sa kalambigitan sa ilegal nga pasugal.
Kini ang pagtoo ni PRO-10 spokesperson Police Lt Col Mardi Hortillosa kon nganong dismayado si Pres Rodrigo Duterte ug gipaundang ang mga padula sa PCSO tungod sa naghitak nga kurapsyon.
Miingon si Hortillosa nga dugay na nga mapasanginlan ang ilang pipila ka kauban sa ilegal nga mga pasugal apan walay makabarog aron pamatud-an ug sila pangkasuhan sa korte.
Apan gitin-aw ni Hortillosa nga wala pay bisan unsa ka pulis ang gireklamo ug gikasuhan tungod sa maong akusasyon.
