Dako ang gawas nga tulubagon sa Presidential Commission for Urban Poor kun PCUP sa pagpanalipod sa katungod sa mga informal settler panahon nga adunay mahitabong demolisyon sa komunidad.
Sumala ni Lay Theologian Wilson C. Amad, ang pamaagi sa gihimong pagguba sa mga balay karon nagpakita nga daw natulog ug wala naglihok ang maong ahensya sa ilang katungdanan.
Gibatbat usab ni Amad nga kinahanglang manguna ang PCUP sa gitawag nga pre-demolition conference kauban ang unom ka ubang ahensya sa kagamhanan aron masiguro ang sakto ug makatarunganong proseso sa matag demolition order.
Tungod sa nakitang kakuwang sa gipahigayon nga orientasyon sa katawhan, andam ang maong opisyal nga personal nga mopahigayon og mga pakigpulong aron matudloan ang mga komunidad bahin sa ilang mga katungod ubos sa balaod.
