CAGAYAN DE ORO CITY-Gipamugos sa dinakpan nga si Balingoan Municipal Councilor Roel Padillo nga ‘planted evidence’ ang 30 ka gramos nga shabu nga nakuha sa iyang panimalay sa Zone 3, Brgy Mantangale, Balingoan, Misamis Oriental.
Subling gipamugos niini nga wala siya sukad malambigit sa paggamit o pagbaligya sa droga ilabina nga may negosyo siya nga mamaligya’g karne nga baboy.
Una nang gibutyag ni Padillo nga gibutang sa mga ahente sa PDEA-10 ibabaw sa brief ang mga suspected shabu.
Gitin-aw ni Padillo nga pag-depensa sa iyang pamilya ang gihimo nila hinungdan nga dugay niyang gi-ablihan ang mga personahe sa PDEA sa ilang panimalay.
Dugang niini nga naalimukawan sya ilabina nga kadlawon mihimo’g operasyon ang mga PDEA hinungdan nga wala siya kapangabri.
Hisayran nga gireklamo sa PDEA-10 sa ilang operasyon ang dugay nga pagpangabli ni Padillo hinungdan nga nadugay ang ilang pagsilbi sa search warrant.
Samtang gibutyag usab ni Balingoan Police Station commander Sr/Insp Noel Hontiveros Gabriel nga gipatawag sa ilang opisina si Municipal Councilor Padillo atol sa pagsugod sa Oplan Tokhang.
Sumala ni Gabriel nga midangop sa ilang buhatan si Padillo apan wala kini mipirma sa mga certification nga gipalagdaan kaniya sa mga otoridad.
Una nang gipanghimaraot sa maong Konsehal ang mga personahe sa PDEA-10 nga magabaan tungod sa pagbutang sa mga shabu sulod sa ilang pinuy-anan kaganihang kadlawon.
Gitin-aw usab ni Gabriel nga wala sila’y kasayuran nga nalambigit sa ilegal nga droga si Councilor Padillo.
Matud ni Gabriel nga wala sa ilang listahan si Padillo isip narco-politician hinungdan wala sila masayod nga nalambigit kini sa paggamit ug pagbaligya sa ilegal nga droga.
Una nang gibutyag ni PDEA Agent Ben Calibre nga wala sa listahan ni President Rodrigo Duterte si Padillo apan lig-on ang mga ebedensiya nga nakuha nila nga aktibo kining tigpayuhot sa gidiling droga.
