CAGAYAN DE ORO CITY-Dili manginlabot si PDEA regional director Wilkins Villanueva sa atubangong kaso sa tulo nila ka kauban nga naghimo’g kagubot sa katawhan sa Fatima Subd.Brgy Pagatpat ning syudad.
Kini human gibutyag ni Villanueva nga wala nila gitugot nga mohimo’g hinangal ang mga suspek ilabina ngadto sa mga sibilyan.
Miingon si Villanueva nga mahimong makahatag sila’g pagkaon sa mga suspek apan dili kini manginlabot sa pagligid sa kaso sa piskalya.
Sila PDEA agents Randy Dollente ug Jestoni Tubongbanua ang nadestino sa Lanao del Norte samtang si Ramil Salido ang naka-assign usab sa Bukidnon Province.
Samtang atubangon sa mga ahente sa PDEA-10 ang kasong attempted murder;illegal discharge of firearms ug multiple grave threats sa piskalya sa syudad.
Kini human unang nangulata ug nagpabuto sa mga armas sila Salido, ollente ug Tubongbanua nga nadestino sa lain-laing bahin sa rehiyon.Kabahin usab sa kasuhan si kanhi PDEA agent si Marvin Pabalate nga miapil sa kagubot.
Miingon si Bulua Police Station commander Sr/Insp Breccia Ruth Towned nga ipaubos usab nila sa paraffin test ang mga suspek ug ballistic examination ang mga armas sa mga suspek nga gigamit pagpabuto atubangan sa taxi drivers.
Nasayran nga pito ka taxi drivers ang inisyal nga miduso’g reklamo batok sa PDEA members.
