CAGAYAN DE ORO CITY – Walay nakuha nga ebedensiya ang mga imbestigador sa Philippine Drug Enforcement Agency (PDEA) ug ubang law enforcement agencies sama sa kapolisan nga suspected druglord si City Mayor Rolando ‘Klarex’ Uy ning syudad.
Kini ang bag-ong pahayag ni PDEA 10 Misamis Oriental Team Supervisor Agent Kent Cardona kabahin sa milugwa nga social media post nga nag-sentro sa mayor ug bisan sa iyang anak nga si Carmen Punong Barangay Kikang Uy.
Gihimo ni Cardona ang katin-awan tungod sa Facebook post sa Peace and Order page nga gidudahan nila nga troll, gigamit niini ang hulagway ni PDEA Director General Moro Virgilio Lazo diin nagsaysay nga dugay nang natumbok ang druglord sa syudad apan lisod makuha kay anaa sa posisyon.
Miingon si Cardona nga wala sukad mihimo’g pahayag ang director general kabahin niini hinungdan nga gilayon sila naglugwa’g komento aron kontrahon ang dakong bakak kabahin sa ilang opisina ug sa mayor sa dakbayan.
Dugang sa opisyal nga hinoon gipatrabaho na nila kini sa ilang laing departmento aron kasuhan ang utok sa mipasipala sa ilang ahensiya.
Hisayrang dili kini ang una apan daghang higayon na nga giakusahan si Klarex nga nalambigit sa illegal nga droga pero wala tuhu-i sa katawhan rason nga gikan sa pagka-kongresista napili na hinoon kining mayor sa dakbayan.
