(Update) CAGAYAN DE ORO CITY – Mitala sa tulo ka tawo ang namatay sa nahimong dugu-on nga paglusad sa anti-illegal drug buy bust operation sa tropa sa PDEA-Misamis Oriental Team batok sa gitoohang organisadong grupo nga tigpayuhot sa ilegal nga droga ning syudad ug lalawigan.
Kini human kompirmaha ni PDEA-MisOr Director Expedito Cardona Jr nga miapas pagkamatay ang usa ka babaye nga napusilan sa ilang operasyon nga si Aramina Hizon nga taga-Jasaan ning lalawigan tungod sa daghang igo sa mga bala samtang gitabang sa Northern Mindanao Medical Center.
Miingon si Cardona nga maoy unang namatay kay giingong misukol ang target sa operation nga si Henryle Go alyas Sir ,29 anyos,ulitawo nga taga-Brgy Carmen ug si Deovern Jay Uy nga residente usab sa Adela Subd,Brgy Camaman-an ning syudad.
Miingon si Cardona nga dili na sila mohatag pa’ dugang komento sa hitabo kay gisalig na nila sa PNP ang imbestigasyon aron kalikayan ang daghang kompikasyon.
Nasuta sa PDEA nga si Go ang nagpaila nga pulis ug dunay kapas ang ilang grupo sa dinagko nga pag-suplay sa Misamis Oriental ug dinhi sa syudad.
Una nang nakuha ang halos tunga sa milyong gitoohang shabu ug kalibre 45 nga armas sa crime scene sa Jasmin Street sa Brgy Carmen sa miaging gabii.
Dugtong usab niini,wala na’y ipasaka nga kaso ang PDEA-MisOr Team batok sa tulo ka suspected drug pushers nga ilang na-neutralized samtang gipaubos sa buy bust operation diha sa Jasmin Street,Brgy Carmen ning syudad sa miaging gabii.
Gipasabot ni Cardona nga tungod kini kay wala na sila’y kasuhan kay pulos nangamatay ang mga suspek nga sila Henryle Go;Deovern Jay Uy ug Aramina Hizon nga giingong nakigpinusilay sa maong operasyon.
Siya miingon nga moduso gihapon sila sa mga dokumento ngadto sa piskalya alang sa mas sihag nga pagtratar sa maong hitabo.
