CAGAYAN DE ORO CITY – Ihatag sa PDEA-10 ang all out support ngadto kang Inter-Agency Committee on Anti illegal Drugs o ICAD co-chairperson ug Vice Pres Leni Robredo.
Kini bisan nga miprangka si Pres Rodrigo Duterte nga wala siya’y salig kang Robredo tungod sa pagbulgar niini sa mga hisgutanan nga alang lamang unta sa ICAD members.
Miingon si PDEA-10 regional director Wilkins Villanueva nga tabangan nila si Robredo kay gitahasan man kini ni Duterte nga sumpu-on ang pagkuyanap sa ilegal nga droga sa nasud.
Una nang nangayo’g kopya si Robredo sa listahan sa top drug personalities sa PDEA apan mismo si Duterte ang wala mutugot niini.
Samtang giaghat ni Citizen Watch for Good Governance o CWGG convenor Atty. Antonio Soriano si Vice Pres Leni Robredo nga dili moluwat sa pwesto isip CAD co-chairperson.
Kini bisan mismo si Pres Rodrigo Duterte ang walay salig sa posisyon nga gihatag niini sa bise presidente.
Miingon si Soriano nga kinahanglang pasagdan na lamang ni Robredo nga ang presidente ang motangtang kaniya sa pagka co-chaiperson sa ICAD.
Dugang niini nga mas maayong magpadayon na lamang si Robredo sa iyang mga maayong gihimo.
