CAGAYAN DE ORO CITY – Giila sa Philippine Drug Enforcement Agency o PDEA-10 nga usa sa dakong kalampusan sa kampanya batok sa illegal nga druga ang pagka-konbiktosa mga akusado nga sila si Atty Michael Roa; Porferio Roa Jr ug John Rey Roa nga pulos taga-Balingasag,Misamis Oriental.
Kini human hukmi ni Regional Trial Court Branch 21 Judge Gil Bollozos nga mabilanggo sa tibuok kinabuhi si Atty Roa ug Porferio Jr gumikan sa pagkakuha’g shabu sa dihang gilusob sa PDEA ang ilang pinuy-anan niadtong Nob 10, 2016.
Si PDEA-10 agent Ben Calibre miingon nga mapasalamaton sila sa suporta sa mga testigo hinungdan nga mas napalig-on ang kaso nga ilang giduso batok sa mga akusado.
Samtang marebyo sa Korte Suprema ang hukom ni Bollozos sa pagkonbikto mga mag-paryenteng Roa.
Kini human nakit-an ni Bollozos ang mga akusado sa pagsupak sa Dangerous Drugs Act of 2002 sa dihang gisilbi ang search warrant batok kanila.
Miingon si Regional State Prosecutor Merlynn Uy nga daghan pa’g legal options ang kampo sa mga akusado sa hukom nga gipahamtang batok kanila.
Dugang ni Uy nga sa dili madugay ibiyahe na sa Davao Penal Colony ang magsoong Roa aron silbihan ang ilang nahimong salaod.
