Nagpadayon ang gipahigayong imbestigasyon sa Philippine Drug Enforcement Agency (PDEA) bahin sa mga shipment sa gidudahang shabu nga gilambigit sa nasud sa Laos, samtang gisusi pa pag-ayo ang matud pa ebidensyang makatabang aron matino ang nagpaluyo sa maong mga operasyon ug mapasaka ang tukmang kaso ngadto sa Department of Justice (DOJ).
Sa eksklusibong pakighinabi sa Bombo radyo Philippines, gibutyag ni Philippine Drug Enforcement Agency spokesperson Atty. Joseph Frederick Calulut nga wala pa nahuman ang imbestigasyon ug padayon pa gihapong gisusi sa ahensya ang mga impormasyon nga ilang nakolekta ayha kini nila isumiter ngadto sa DOJ.
Dungan sa imbestigasyon, gitan-aw usab sa ahensya kung gagamiton ba sa international drug syndicate ang Pilipinas isip transshipment point o lugar nga gaagian lang sa ilegal nga droga ayha kini dal-on ngadto sa uban pang destinasyon.
Matud ni Calulut, dili lamang ang Pilipinas ang ginadad-an sa mga sindikato og ilegal nga droga, lakip na usab ang uban pang mga nasud sa rehiyon sa Asia-Pacific.
Mahinumdoman nga naidtong bulan sa Oktubre kay nakumpiska sa nasud sa Laos ang anaa sa 521 ka kilo nga gidudahang shabu nga nagkantidad og mokabat sa 3.54 bilyon pesos nga plano unta dad-on padulong sa Pilipinas.
Gawas niini, nakumpiska usab niadtong Nobyembre 4 ang mokabat sa 200 ka kilo sa gidudahang shabu sa Manila International Container Port nga nagkantidad og gibana-banang 1.36 bilyon pesos.
Dugtong niini, mahinumdoman nga gipasiugda ni Interior Secretary Jonvic Remulla nga nakabaton na matud pa og positibong resulta ang kampanya sa kagamhanan batok sa ilegal nga droga. (raniel mahunyag)
.jpg "Malacañang, nagpahigayon sa mga programa sa pagpalambo sa kahanas ug pagpalapad sa oportunidad sa trabaho")
