CAGAYAN DE ORO CITY-Gipasalig sa pamulis sa syudad nga kanunay nila hatagan sa suporta ang PDEA operatives sa pakigbatok sa mga tawo nga nalambigit sa gidiling droga.
Kini human hiniusa nga nasikop sa City Intelligence Unit sa COCPO ug airport police kuyog ang PDEA-10 ang suspek nga si Ralph Martin Go Rafanan nga nagdala’g 17 ka ecstasy gikan sa kauluhan.
Miingon si COCPO spokesperson C/Insp Mardy Hortillosa nga andam sila mohatag sa ayuda ilabina kon gikinahanglan sa PDEA ang mga personahe pag-abot sa anti-illegal drugs operation.
Samtang tukion sa konseho ang isyu sa pagkasikop sa negosyante nga nakuhaa’g 17 ka ecstasy tablets nga laraw ibaligya sa sulod sa mga disco bar dinhi sa syudad.
Miingon si Kag George Goking,chairman sa trade and commerce committee sa konseho nga makighisgot siya niini sa ubang mga komitiba aron matun-an ang angay buhaton nga mapugngan ang pagkuyanap sa maong klase sa droga ilabina sulod sa mga bar sa syudad.
Una niini,gihangyo ni PDEA agent Ben Calibre ang bar owners nga magbantay sa ilang mga customer nga nagpakuyanap sa ecstasy aron makalikay sila sa pagka-aresto.
