CAGAYAN DE ORO CITY – Gitin-aw sa PDEA Region 10 nga wala pa sila’y nadawat nga report bahin ni Cagayan de Oro City 1st District Congressman Rolando “Klarex” Uy nga “drug lord” sa Northern Mindanao.
Kini ang gibutyag ni PDEA 10 Regional Director Jigger Montallana sa pakighinabi sa Bombo Radyo Cagayan de Oro.
Miingon si Montallana nga anaa sila’y proseso sa pag-validate sa mga gikataho nga mga personalidad sa politika nga nalambigit sa droga.
Miingon si Ocon sa ilang regular session nga ang kongresista nalambigit sa gidiling droga ug nalakip sa drug list ni Pres. Rodrigo Duterte.
Apan namahayag si Montallana nga wala sa druglist ni President Rodrigo Duterte si Uy sukwahi sa alegasyon ni Ocon.
Samtang namahayag usab ang PDEA Misamis Oriental nga wala’y bisan usa nga narco-politician gikan sa Cagayan de Oro. Kini gibutyag ni PDEA Misamis Oriental Provincial Officer Expedito Cardona.
Gitin-aw ni Cardona nga wala sila’y napamatud-an nga politiko dinhi sa syudad nga nalambigit sa gidiling druga.
Anaa lamang gikataho kaniadto nga gipa-validate sa ila apan migawas nga negatibo ang giingong ‘incumbent’ nga opisyal sa dakbayan.
Gipasabot ni Cardona nga wala sila sa katungod nga mubulgar sa mga pangalan nga nalakip sa lista ni Pres. Rodrigo Dutere gawas sa presidente mismo.
Apan gisiguro niini nga wala’y nadawatan ang ilang buhatan bahin kang Uy nga nalakip sa maong PRRD drug list.
