CAGAYAN DE ORO CITY – Gusto ni PDEA Director General Wilkins Villanueva na dagko nga illegal drug suppliers ang pahamtangan sa silot-kamatayon dinhi sa nasud.
Kini kon hingpit ibalik ang death penalty nga unang gihangyo ni Pres Rodrigo Duterte sa iyang ika-lima nga State of the Nation Address o SONA ngadto sa Kongreso.
Namahayag si PDEA spokesperson Derrick Carreon nga uyon si Vilanueva nga ibalik ang silot-kamatayon apan sa kondisyon nga ang utok sa illegal drugs operations ang mapahamtangan niini.
Apan dili uyon si City Mayor Oscar Moreno nga ibalik pa ang death penalty sa pagtoo nga makakibhang sa mahitabong kreminalidad sa nasud.
Reaksyon kini ni Moreno sa tinguha ni Duterte nga ipatuma’g balik isip tubag sa padayong pagkuyanap sa ilegal nga droga sa Pilipinas.
Miingon ang mayor nga gitahod niini ang tinguha ni Duterte nga mahunong ang pagkuyanap sa droga nga binuhatan sa mga dagkong langyaw’ng mga sindikato.
Gani,gisupak ni Cagayan de Oro 2nd District Rep.Rufus Rodriguez ang kagustuhan ni Duterte nga ibalik ang silot-kamatayon batok sa mga tawo nga makahimo’g ngilngig nga kremin sa nasud.
Gitawag ni Rodriguez nga kontra-kabus ang klase sa death penalty nga gusto mahitabo ni Duterte ngadto sa konbiktado nga mga kriminal.
Namahayag kini nga dako siya nga uyon nga ibalik ang silot-kamatayon apan maoy pahamtangan niini ang langyaw’ng mga sindikato nga nagpalusot sa ilegal nga droga sa nasud.
Dugtong niini,ipatuman lamang sa PNP kon unsa man ang imando kanila sa balaod kabahin sa pag-nuetralize sa nagkadaiyang kriminalidad sa nasud.
Kini ang gipabati nga reaksyon ni Police Regional Office 10 spokesperson Lt Col Mardy Hortillosa kon ugaling mahatagan sa higayon nga mabalik ang silot-kamatayon batok sa convicted high profile criminals sa nasud.
Miingon si Hortillosa nga may lain-lain sila’g opinyon sa kagustuhan ni Duterte apan mas ipalabi nila ang interes alang sa kabag-an nga katawhan.
